Liturgjia e Fjalës – 29 nëntor – e premte – Java XXXIV gjatë vitit
Written by Radio Maria on October 29, 2024
JAVA E XXXIV GJATË VITIT
E PREMTE
Antifona e hyrjes Krh. Ps 84, 9
Zoti premton paqen për popullin e vet, për të dashurit e vet, e për ata që me gjithë zemër kthehen.
Kolekta
Nxiti, po të lutemi, o Zot, vullnetet e besimtarëve të tu, ta zbatojnë me kujdes frytin e misterit shpëtimtar, që të fitojnë hire të shumta të mirësisë sate. Nëpër Zotin tonë Jezu Krishtin, Birin tënd, që me ty jeton e mbretëron në bashkim me Shpirtin Shenjt, Hyj, për të gjithë shekujt e shekujve.
Leximi i parë (Zb 20, 1-4. 11 – 21, 2) (fq. 1753)
Pashë Jerusalemin e ri: zbriste nga qielli.
Lexim prej Librit të Zbulesës së Shën Gjonit apostull
Unë Gjoni, 1 pashë : një engjëll tjetër po zbriste prej qiellit me çelësin e Humnerës dhe me hekura të mëdha në dorë. 2 Ai e kapi Draguan – Gjarprin e vjetër – Djallin, Satanin – dhe e lidhi në hekura për një mijë vjet. 3 E plandosi në Humnerë, e mbylli dhe e vulosi derën mbi të që të mos i ngashënjejë njerëzit derisa të plotësohen një mijë vjetët. Atëherë duhet të zgjidhet për pak kohë.
4 Mandej pashë edhe fronet: Atyre që ndenjën në to u qe dhënë pushteti të gjykojnë. Pashë edhe shpirtrat e atyre që ishin prerë për shkak të dëshmisë së Jezusit dhe për shkak të Fjalës së Hyjit, po ashtu edhe ata që nuk e adhuruan Egërsirën dhe truporen e saj dhe nuk e morën vulën në ballë as në dorë të tyre.
Ata u kthyen në jetë dhe bashkë me Krishtin mbretëruan një mijë vjet.
11 Atëherë pashë një fron të madh dhe të bardhë edhe Atë që rri në të. Para tij u zhduk toka e qielli pa lënë farë gjurme. 12 Pashë edhe të vdekurit: të mëdhenj dhe të vegjël, në këmbë para fronit. Atëherë u hapën librat. U hap edhe një libër tjetër: libri i jetës. Të vdekurit u gjykuan sipas shkrimeve që ishin në libra – sipas veprave të tyre. 13 Deti i ktheu të vdekurit që ishin në të, po ashtu edhe Vdekja dhe Nëntoka i kthyen të vdekurit që ishin në to: të gjithë qenë gjykuar sipas veprave të veta.
14 Atëherë edhe Vdekja dhe Nëntoka qenë hedhur në liqenin e zjarrtë. Liqeni i zjarrtë është vdekja e dytë. 15 Kushdo nuk u gjet i shkruar në librin e jetës qe plandosur në liqenin e zjarrtë.
21,1 Atëherë pashë një qiell të ri e një tokë të re, sepse qielli i parë dhe toka e parë u zhdukën, as deti nuk është më.
2 Pashë edhe qytetin e shenjtë – Jerusalemin e ri: zbriste nga qielli, prej Hyjit, i stolisur porsi nusja e përgatitur për të fejuarin e vet.
Fjala e Zotit
Psalmi 84 (83) (fq. 754)
Ref. LUM ATA QË BANOJNË NË SHTËPINË E ZOTIT
3 Shpirti im shkrihet e meket
për pallatet e Zotit.
Zemra ime e trupi im
i brohorisin Hyjit të gjallë.
Ref. LUM ATA QË BANOJNË NË SHTËPINË E ZOTIT
4 Edhe trumcaku e gjen bunin e vet
edhe turtulli çerdhen e vet
ku i vë zogjtë e vet:
e unë lteret e tu, o Zoti i ushtrive,
Mbreti im e Hyji im!
Ref. LUM ATA QË BANOJNË NË SHTËPINË E ZOTIT
5 Lum ata që banojnë në shtëpinë tënde:
do të të lavdërojnë për amshim.
6 Lum ai që në ty gjen forcën
dhe vendos për shtegtim të shenjtë.
Ref. LUM ATA QË BANOJNË NË SHTËPINË E ZOTIT
12 Sepse diell e shqyt është Zoti Hyj,
ai dhuron hirin e nderin.
Zoti nuk ua mohon të mirat atyre
që jetojnë të pafajshëm.
Ref. LUM ATA QË BANOJNË NË SHTËPINË E ZOTIT
Aleluja!
Unë jam ai që është, që ishte dhe që po vjen; atij që deri në fund do t’i kryej veprat e mi do t’i jap Yllin e Dritës. (Krh. Zb 1, 8; 2, 26.28)
Aleluja!
Ungjilli (Lk 21, 29-33) (fq. 1497)
Kur të shihni se po ndodhin këto, dijeni se Mbretëria e Hyjit është afër.
Leximi i Ungjillit të shenjtë sipas Lukës
Në atë kohë, Jezusi 29 u tregoi nxënësve të vet këtë shëmbëlltyrë: »Vëreni fikun e të gjitha pemët. 30 Kur të lulëzojnë edhe vetë e dini se vera është afër. 31 Kështu edhe ju, kur të shihni se po ndodhin këto, dijeni se Mbretëria e Hyjit është afër. 32 Për të vërtetë po ju them: nuk do të kalojë kjo brezni para të ndodhin të gjitha. 33 Qielli e toka do të zhduken, e fjalët e mia nuk do të bien poshtë.«
Fjala e Zotit
Lutja mbi dhurata
Pranoji, po të lutemi, o Zot, dhuratat e shenjta, që urdhërove t’i kushtohen emrit tënd, e bëj që, në saje të tyre, t’i pëlqejmë mirësisë sate dhe t’i zbatojmë përherë urdhërimet e tua. Nëpër Krishtin Zotin tonë.
Antifona e kungimit Ps 116, 1-2
Lavdërojeni Zotin, o kombe të gjitha, sepse e madhe është mëshira e tij ndaj nesh.
Ose: Mt 28, 20
Ja, unë jam me ju gjithmonë, deri në të sosur të botës, thotë Zoti.
Lutja pas kungimit
Po të lutemi, o Zot, mos lejo kurrë të ndahemi prej teje, pasi na dhe mundësinë të marrim pjesë me gëzim në këto mistere hyjnore. Nëpër Krishtin Zotin tonë.
RM Albania